LPBCCI Logo

ສະພາການຄ້າ ແລະ ອຸດສະຫະກໍາ ແຂວງຫຼວງພະບາງ

Luang Prabang Chamber of Commerce and Industry

ກອງປະຊຸມພົບປະ ປຶກສາຫາລືລະຫວ່າງພາກລັດ ແລະ ພາກທຸລະກິດ ແຂວງຫຼວງພະບາງ

ໃນຕອນເຊົ້າຂອງວັນທີ 21 ສິງຫາ(08) 2019 ນີ້ ຢູ່ທີ່ພະແນກ ອຸດສາຫະກໍາ ແລະ ການຄ້າແຂວງຫຼວງພະບາງ ໄດ້ມີການຈັດກອງປະຊຸມພົບປະ ປຶກສາຫາລືລະຫວ່າງພາກລັດ ແລະ ພາກທຸລະກິດຂື້ນ ໂດຍພາຍໃຕ້ການເປັນປະທານຂອງ ທ່ານ ສາຍສະໝອນ ຄົມທະວົງ ຮອງເລຂາພັກແຂວງ ປະທານສະພາປະຊາຊົນ ແຂວງຫຼວງພະບາງ ແລະ ທ່ານ ສຸກັນ ບຸນຍົງ ຄະນະກໍາມະການພັກແຂວງ ຮອງເຈົ້າແຂວງແຂວງພະບາງຊີ້ນໍາຝ່າຍເສດຖະກິດ

ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອເປັນການຮັບຟັງບັນຫາ, ຂໍ້ຄ້າງຄາໃນການດໍາເນີນທຸລະກິດ ແລະ ວິໄສທັດໃນການພັດທະນາທຸລະກິດ ກໍ່ຄືການພັດທະນາ ແລະ ສ້າງສາປະເທດຊາດໃນແນວຄວາມຄິດຂອງພາກທຸລະກິດ, ພາຍໃນກອງປະຊຸມໄດ້ມີນັກທຸລະກິດຈາກຫຼາກຫຼາຍສາຂາອາຊີບເຊີ່ງມີທັງນັກທຸລະກິດຄົນລາວ ແລະ ຊາວຕ່າງປະເທດເຂົ້າຮ່ວມ ແລະ ໄດ້ມີການແລກປ່ຽນປະກອບຄໍາເຫັນຢ່າງກົງໄປກົງມາ, ມີບັນຍາກາດອັນດີ ນັກທຸລະກິດຫຼາຍໆທ່ານໄດ້ມີການຂື້ນສະເໜີປະກອບຄໍາຄິດຄໍາເຫັນຕໍ່ກອງປະຊຸມ, ໃນຕອນທ້າຍຂອງກອງປະຊຸມ ທ່ານ ສາຍສະໝອນ ຄົມທະວົງ ຮຽກຮ້ອງໃຫ້ທຸກພາກສ່ວນ ທັງພາກລັດ ແລະ ພາກທຸລະກິດ ມາຮ່ວມໃຈກັນປຸ້ມລຸມກັນ ສ້າງສາ ແລະ ພັດທະນາເສດຖະກິດຂອງແຂວງເວົ້າລວມ ເວົ້າສະເພາະກໍ່ຄືປະເທດຊາດໃຫ້ມີການຂະຫຍາຍຕົວ ແລະ ກ່າວພັດທະນາຂື້ນທຽບທັນກັບປະເທດເພື່ອນບ້ານເທື່ອລະກ້າວ ໂດຍໄດ້ເນັ້ນຢໍ້າໃຫ້ທຸກພາກສ່ວນນໍາໃຊ້ຫຼັກການ 3 ເປີດຂອງ ທ່ານນາຍົກລັດຖະມົນຕີ່ທີ່ໄດ້ວາງອອກ ເຊີ່ງທ່ານໄດ້ກ່າວວ່າ: 1. ທຸກພາກສ່ວນຕ້ອງໄດ້ເປີດປະຕູສູ່ພາຍນອກ: ເຮັດຈັງໃດຈະໄດ້ມີການສ້າງສາພັດທະນາປະເທດຊາດ ມີການກະຕຸ້ນເສດຖະກິດຂອງແຂວງ ເປີດກວ້າງໃຫ້ມີການລົງທືນ ແລະ ຍາດແຍ່ງການລົງທືນຂອງນັກລົງທືນທັງພາຍໃນ ແລະ ຕ່າງປະເທດໃຫ້ມີການລົງທືນຢ່າງເສລີ ແຕ່ຕ້ອງໃຫ້ສອດຄ່ອງ ແລະ ຢູ່ບົນພື້ນຖານລະບຽບຫຼັກການຂອງ ສປປ.ລາວ, 2. ເປີດປະຕູສີ່ງກີດຂວາງ ແລະ ກົນໄກຕ່າງໆໃນການດໍາເນີນທຸກິດ: ສ້າງເຮັດໃຫ້ຫົວໜ່ວຍທຸລະກິດສາມາດດໍາເນີນທຸລະກິດຢ່າງສະດວກສະບາຍ ເດີນແມ່ນແລ່ນສະດວກ, ມີການພັດທະນາ ແລະ ເປັນໄປຕາມກົນໄກຕະຫຼາດຂອງພາກພື້ນ ແລະ ສາກົນ, ທັບມ້າງສີ່ງທີ່ກົດໜ່ວງທວງດືງການຂະຫຍາຍຕົວຂອງການດໍາເນີນທຸລະກິດເທື່ອລະກ້າວ, 3. ເປີດໃຈ: ທຸກພາກສ່ວນຕ້ອງມີການເປີດໃຈຍອມຮັບຕໍ່ສີ່ງໃໝ່ໆ ຍອມຮັບຕໍ່ການພັດທະນາ ເພື່ອເຮັດຈັງໃດຈະໄດ້ມີການສ້າງສາ ແລະ ພັດທະນາປະເທດຊາດໃຫ້ທຽບເທົ່າກັບປະເທດເພື່ອນບ້ານ ສິ່ງໃດທີ່ຫຼ້າຫຼັງຕ້ອງໄດ້ມີການປັບປຸງປ່ຽນແປງ ແລະ ເຕົ້າໂຮມກັນໃຫ້ເປັນປຶກແຜ່ນ ເປັນຈິດໜື່ງໃຈດຽວ ຮ່ວມກັນກ້າວໄປໃນເສັ້ນທາງດຽວກັນ ເພື່ອນສ້າງສາ ແລະ ພັດທະນາປະເທດຊາດ.

ກອງປະຊຸມໃນຄັ້ງນີ້ແມ່ນເປັນກອງປະຊຸມເປີດກວ້າງສໍາລັບ ພາກລັດ ແລະ ພາກທຸລະກິດ ໃຫ້ໄດ້ມີການພົບປະ ຮ່ວມປຶກສາຫາລືແລກປ່ຽນແນວຄວາມຄິດຄວາມເຫັນ ແລະ ບັນຫາຕ່າງໆຮ່ວມກັນ ເພື່ອເຮັດໃຫ້ທຸກພາກສ່ວນໄດ້ມີຄວາມເຂົ້າໃຈ ມີການແກ້ໄຂບັນຫາທີ່ຂັດຂ້ອງໝອງໃຈຮ່ວມກັນ, ມີຄວາມສາມັກຮ່ວມກັນເປັນປຶກແຜ່ນໃນການສ້າງສາ ແລະ ພັດທະນາປະເທດຊາດໃຫ້ກ້າວຂື້ນສູ່ຄວາມສີວິໄລໃນຕໍ່ໜ້າ,  ໂອກາດດຽວກັນ ທ່ານ ສຸກັນ ບຸນຍົງ ກໍ່ຍັງໄດ້ແຈ້ງຕໍ່ທີ່ປະຊຸມວ່າ ໃນເວລາອັນໃກ້ນີ້ແຂວງຫຼວງພະບາງ ຈະໄດ້ມີການເປີດບັນແຂ່ງຂັນຮັກຊາດພັດທະນາໃນຂັ້ນແຂວງ ແລະ ໄດ້ຮຽກຮ້ອງໃຫ້ທຸກພາກສ່ວນຮ່ວມກັນເຂົ້າຮ່ວມຈັດຕັ້ງປະຕິດບັດວຽກງານຕ່າງໆ ແລະ ຜັນຂະຫຍາຍໃຫ້ເກີດດອກອອກຜົນຢ່າງແທ້ຈິງ

ກອງປະຊຸມໄດ້ອັດລົງເວລາ 11:50 ນາທີ ຂອງວັນດຽວກັນ ດ້ວຍຜົນສໍາເລັດອັນຈົບງາມ.